Presidenca e Parë e Kishës së Jezu Krishtit të Shenjtorëve të Ditëve të Mëvonshme ka lëshuar deklaratën në vijim:
“Ne bashkohemi me botën që po vajton ndarjen nga jeta të Shenjtërisë së Tij, Papa Françeskut. Udhëheqja e tij plot kurajë e dhembshuri ka bekuar jetë të panumërta. Ne u shprehim ngushëllimet tona të përzemërta të gjithë atyre që shihnin tek ai për frymëzim e këshillë. Ndërkohë që bota ndalet për të kujtuar shembullin e tij të faljes dhe shërbimit, ne ndiejmë mirënjohje të thellë për mirësinë e një jete të jetuar mirë dhe gëzohemi në shpresën e një ringjalljeje të lavdishme, të bërë të mundur nëpërmjet flijimit shlyes të Jezu Krishtit.”
Në vitin 2019, Presidenti Rasëll M. Nelson u takua me Papa Françeskun brenda Vatikanit, takimi i parë i atij lloji. Për atë mbledhje, Presidenti Nelson tha: “Ne patëm përvojën më të përzemërt, më të paharrueshme me Shenjtërinë e Tij. Ai ishte jashtëzakonisht i hirshëm, zemërbutë dhe mikpritës. Çfarë burri gojëmbël dhe i mrekullueshëm është ai dhe sa me fat janë njerëzit katolikë që kanë një udhëheqës kaq të hirshëm, të aftë, plot interesim dhe dashuri!”
Papa Françesku mirëpret Presidentin Rasëll M. Nelson në Vatikan, të shtunën, më 9 mars 2019.
Presidenti Rasëll M. Nelson përshëndetet me Papa Françeskun në Vatikan, në Romë të Italisë, të shtunën, më 9 mars 2019.
Presidenti Rasëll M. Nelson i dhuron Papa Françeskut një statujë të vogël “Christus” dhe një kopje në kornizë të proklamatës së Kishës mbi familjen. Presidenti Nelson dhe Presidenti M. Rasëll Ballard u takuan me Papën, të shtunën, më 9 mars 2019.
Papa Françesku përshëndet Presidentin Henri B. Ajring në Sallën e Sinodit [të Këshillit] të qytetit të Vatikanit, ndërkohë që fillon një simpozium mbi martesën. Udhëheqës dhe studiues të fesë që përfaqësonin 14 tradita fetare nga 23 shtete, u mblodhën në Vatikan në datat 17–19 nëntor 2014, në një mbledhje historike të organizuar nga Kisha Katolike për të diskutuar se si burrat dhe gratë e plotësojnë njëri‑tjetrin në martesë.