Organizata Mary’s Smile [Buzëqeshja e Marisë] e themeluar nga gra dhe nëna profesioniste, synon të ngrejë një rrjet me përqendrim të krishterë, për kujdestarinë e përkohshme për fëmijët me trauma. Kisha e Jezu Krishtit e Shenjtorëve të Ditëve të Mëvonshme ka punuar me organizatën Mary’s Smile [Buzëqeshja e Marisë] për të siguruar fonde për t’i mundësuar kësaj organizate që të sistemojë 68 fëmijë të cenueshëm në shtëpitë e prindërve të trajnuar, me kujdestari të përkohshme, në gjashtë muajt e fundit.
Sot në Hungari, 21 000 fëmijë jetojnë nën kujdesin e shtetit dhe përafërsisht 7 000 fëmijë nuk kanë një familje kujdestare të përkohshme. Kapaciteti i shtëpive të fëmijëve është i kufizuar ngaqë rrjetet ekzistuese për prindër me kujdestari të përkohshme nuk mund të rekrutojnë mjaftueshëm prindër të rinj me kujdestari të përkohshme. Shumica e fëmijëve kanë vuajtur trauma dhe keqtrajtime ekstreme në familjet e tyre biologjike.
Organizata Mary’s Smile [Buzëqeshja e Marisë] identifikon dhe trajnon prindër të mundshëm me kujdestari të përkohshme për t’u kujdesur për këta fëmijë dhe ka trajnuar 40 prindër të rinj në gjashtë muajt e kaluar. Këshillimi, terapia dhe përkrahja e vazhdueshme profesionale i kanë ndihmuar këta prindër me kujdestari të përkohshme që t’i kapërcejnë vështirësitë e fillimit të kujdestarisë. Terapia për fëmijët ka qenë e suksesshme gjithashtu. Një fëmijë që nuk e kishte frekuentuar shkollën para se të vendosej në një familje me kujdestari të përkohshme, tani është bërë një nxënës i shkëlqyer dhe një futbollist.
Themeluesit zgjodhën emrin Mary’s Smile [Buzëqeshja e Marisë] sepse ata mund ta përfytyronin Marinë, nënën e Jezusit, duke parë nga lart punën e tyre dhe duke buzëqeshur për shkak të ndihmës së dhembshur që u jepet fëmijëve. Kjo organizatë po siguron kujdesin zemërgjerë të frymëzuar nga emri që mbart.